Nakatakdang parangalan at bigyan ng promosyon ang mga pulis na nakipagbarilan at nakapatay sa limang miyembro ng kidnapping group sa San Pablo City, Laguna.
Ito ang tiniyak ni outgoing Philippine National Police Chief, Director-General Ronald Dela Rosa sa kanyang pagbisita sa mga nasugatang pulis sa San Pablo City Medical Center.
Ang mga nasugatang pulis na miyembro ng Candelaria Municipal Police ay sina PO1 January de Ramos Menfroza at PO1 Jun-Jun Jabola Villaflor.
Nauna na ring binigyan ng Posthumous Award ang nasawing si PO1 Sarah Jane Andal, na miyembro rin ng Candelaria Police.
Martes ng madaling araw nang tugisin at maka-engkwentro ng grupo nina Andal ang mga miyembro ng Barrios Kidnapping Syndicate sa Maharlika Highway sa barangay San Nicolas.
Samantala, kinilala na ng Laguna at Quezon Provincial Police ang apat sa limang napatay na suspek na sina Juan Vicente Singabor alyas PO2 Rebadulla; Jairo Olegario alyas PO3 Dizon, residente ng Novaliches Quezon City; Kent Padernal Lim; Marcelino Sican alyas Daluz.
Nagpanggap ang lima bilang mga pulis batay sa suot nilang PNP fatigue uniform nang maganap ang insidente.