Hinimok ni Pangulong Rodrigo Duterte ang mga Indian Company na mag-invest o palawakin ang kanilang negosyo sa Pilipinas.
Ito ang tiniyak ni Pangulong Duterte sa kanyang pagharap sa mga negosyanteng Indiano sa New Delhi bilang bahagi ng ASEAN-India Commemorative Summit at Republic Day Celebrations ng India.
Ipinangako rin ni Pangulong Duterte na po-protektahan ang mga Indian Investor at Businessmen kasabay ng pagtitiyak na padadaliin ang pag-ne-negosyo sa bansa subalit hindi naman anya sila dapat magpatukso sa katiwalian.
Aabot sa isa punto dalawampu’t limang Bilyong Dolyar ang iniuwing investment pledges ng delegasyon ng Pangulo partikular sa information technology at energy sector sa kanyang tatlong araw na official visit sa India na maaaring makapag-generate ng tinatayang sampung libong trabaho.
Samantala, inabisuhan naman ni Pangulong Duterte ang mga Indian Business leader na iwasan muna ang Mindanao dahil sa umiiral na martial law.