Muling tiniyak ng Armed Forces of the Philippines (AFP) ang mapayapa at maayos na ikalawang plebesito para sa Bangsamoro Organic Law o BOL, sa Miyerkoles, Pebrero 6.
Ayon kay AFP-Western Mindanao Command Spokesman, Lt. Col. Gerry Besana, nananatili ang alert status ng buong militar at Philippine National Police sa gitna ng bakbakan ng militar at mga bandidong grupo sa Mindanao.
Naka-deploy na aniya sa anim na bayan ng Lanao del Norte at tatlumpu’t siyam (39) na barangay sa North Cotabato ang karagdagang puwersa ng tropa ng pamahalaan upang magbantay sa peace and order situation para sa ikalawang plebisito.
Kinumpirma rin ng opisyal na may mga ipinadalang karagdagang tauhan ang Commission on Elections (Comelec) para sa nalalapit na halalan.
PNP magpapadala ng dagdag na puwersa para sa ikalawang plebisito ng BOL
Nag-deploy na ng isang batalyong Special Action Force (SAF) commandos ang Philippine National Police o PNP sa limang bayan sa Lanao del Norte at tatlumpung (30) barangay sa North Cotabato.
Ayon kay PNP Chief Director General Oscar Albayalde, bahagi ito ng ipatutupad na seguridad ng mga awtoridad para sa ikalawang bahagi ng plebisito sa Bangsamoro Organic Law (BOL) sa Miyerkoles, Pebrero 6.
Dagdag ni Albayalde, magpapadala pa sila ng karagdagang puwersa sa mga lugar na pagdadarausan ng plebisito.
Aniya, nais nilang matiyak na magiging mapayapa at walang makasisingit na masasamang elemento na nagbabalak ng masama kasabay ng isasagawang plebisito.
Batay sa orihinal na schedule ni Albayalde, nakatakda itong mag-ikot sa mga lugar na pagdarausan ng ikalawang plebisito para inspeksyon ang mga inilatag na seguridad doon.—By Krista de Dios
—-
