Tuloy pa rin ang opensiba ng pamahalaan laban sa Partido Komunista ng Pilipinas – Bagong Hukbong Bayan sa harap na rin ng muling pagpapatuloy ng usapang pangkapayapaan.
Iyan ang inihayag ng Malakaniyang makaraaang itanggi nito na may nilagdaan nang stand down order o tigil opensiba sa pagitan ng pamahalaan at ng National Democratic Front.
Ayon kay Presidential Spokesman Harry Roque, kay CPP-NPA at NDF Founding Chairman Jose Maria Sison lamang aniya nagmula ang ulat na mayruon na umanong stand down na magsisimula sa Hunyo 21 at magpapatuloy ang Peactalks sa Hunyo 28.
Kaugnay niyan, naglabas ng paglilinaw si Roque kagabi na bukas pa rin ang pamahalaan sa bansang Norway para tumayong third party facilitator ng peacetalks.
Una rito, sinabi ni Roque na posibleng hindi na kunin ng Pilipinas ang tulong ng Norway bilang third party facilitator ng peacetalks sabay giit na dapat sa Pilipinas na ito ipagpatuloy.
Samantala, pinagsabihan naman ni Roque si Sison na maghinay-hinay sa mga ilalabas na pahayag sa publiko ang anumang napagkasunduan sa ginagawang back channeling talks at hayaan ang gubyerno na magbigay ng opisyal na anunsyo hinggil dito.