Ipinakita at ipinaramdam ang pinakamalalang puwedeng mangyari kapag nagkaroon ng malakas na lindol sa bansa sa sabay-sabay na nationwide earthquake drill kaninang umaga.
Nagkalat ang mga duguang katawan sa mga kalsada, ilang mga gusali ang gumuho at ang mga kalsada ay tila mga nilamukos na papel.
Ganitong scenario ang ipinakita ng Office of the Civil Defense sa isinagawang earthquake drill kung saan nagsilbing emergency evacuation center ang Bonifacio High Street Center sa Taguig.
Ipinakita rin sa earthquake drill kung gaano kabilis makakaresponde at makakakilos ang Local Government Units, ang PNP , Philippine Army at iba pang emergency response teams.
Kabilang sa isinagawang drill ang pagtulong sa mga sugatang tao na nasa mga kalsada, pagbuhat sa mga biktima patungo sa evacuation center, pag-rescue sa mga construction workers at iba pang tao na nasa itaas ng mga gusali at airlifting ng mga pasyente patungo sa mga ospital.
By Len Aguirre
Photo Courtesy of: JonathanAndal