Paiiralin pa rin ang mahigpit na seguridad sa unang SONA ng Pangulong Rodrigo Duterte sa Lunes, July 25.
Ito ayon sa mga awtoridad ay kahit walang isasagawang kilos protesta sa nasabing SONA.
Nabatid na mahigpit ang seguridad sa vicinity ng Batasan Complex at sa katunayan ay hindi na makakapasok kahit ang mga dating may access sa compound kung hindi nakatala sa special list na hawak ng House Security Personnel.
Lalagyan din ng identification tag ang bawat papasok hanggang sa araw ng linggo bukod pa sa official SONA ID.
Paiiralin din ang color coding kaya limitado ang pagkakaroon ng pagkakataong makalapit sa pagdarausan ng SONA.
‘Kilos suporta’
Samantala, uubra nang makalapit hanggang 600 metro sa Batasan Complex ang mga grupong magsasagawa ng pagkilos sa SONA ng Pangulong Rodrigo Duterte sa Lunes, July 25
Ipinabatid ito ni NCRPO Director Chief Supt. Oscar Albayalde kaugnay sa ilang pagbabagong ipatutupad sa seguridad kaugnay sa unang SONA ni Duterte.
Ayon kay Albayalde, inaasahan nilang darating ang dalawang bus ng mga supporter ni Duterte mula sa Davao City.
Sinabi pa ni Albayalde na may ipatutupad din silang rerouting at sarado na aniya ang Commonwealth Avenue simula alas-12:01 ng hatinggabi ng Lunes.
By Judith Larino