Kinontra ng mga tiga-usig ng pamahalaan ang kahilingan nina Senador Jinggoy Estrada at Bong Revilla na makadalo sa burol para sa yumaong si German ‘Kuya Germs’ Moreno.
Sa isinumite nilang opposition paper, iginiit ng government prosecutors na mangangailangan ng matinding seguridad ang pagdalo nina Revilla at Estrada sa burol ni Kuya Germs dahil bukas ito sa publiko.
Binigyang diin ng prosecution na dapat lamang malimitahan ang pagkilos ni Estrada lalo pang ibinasura naman ng Sandiganbayan ang kanyang mosyon na makapagpiyansa.
Sa panig ni Revilla, sinabi ng prosecution na bagamat kinikilala nila ang pagiging malapit ng aktor/senador kay Kuya Germs, wala silang makitang emergency o extraordinary circumstance para payagan itong makalabas ng piitan.
Una rito, hiniling ni Estrada na makadalaw sya sa burol ni Kuya Germs sa Mount Carmel Church mula alas -7:00 hanggang alas-10:00 ngayong gabi.
Samantala, sa hiwalay na petisyon ay nais naman ni Revilla na makadalaw kay Kuya Germs mula alas-3:00 ng hapon hanggang alas-8:00 ng ngayong gabi o bukas ng gabi.
By Len Aguirre | Jill Resontoc (Patrol 7)