Agad na nasawi si Ginang Conchita Nequita, 58-anyos, habang sugatan naman si Francis Bio, matapos ang nangyaring landslide sa Barangay Exciban, Labo, Camarines Norte, kaninang alas 2:00 ng madaling-araw.
Ayon sa mga otoridad, mahimbing na natutulog ang mga biktima nang bigla na lamang gumuho ang lupa at natabunan ang buong bahay.
Maswerte namang agad na nakalabas ang nasugatang si Bio at lima pa nitong mga kaanak, kabilang na ang tatlong bata.
Samantalang, hindi naman pinalad na makaligtas si Ginang Nequita matapos na tuluyang matabunan ng lupa ang gumuhong bahay.
Inabot ng tatlong oras ang paghuhuhukay ng mga rescuer bago tuluyang nakuha ang wala ng buhay na katawan ng ginang.
Base sa ulat, bumigay ang lupa sa Barangay Exciban dahil sa patuloy na pag-ulan dulot ng Bagyong Urduja.