Kuntento ang Simbahang Katolika sa inilatag na seguridad sa pista ng Itim na Nazareno.
Sa panayam ng DWIZ, sinabi ni Lingayen-Dagupan Archbishop Emeritus Oscar Cruz na sa kabila ng sinasabing terror threat, mapayapang naidaos ang traslacion kung saan milyung-milyong deboto ang lumahok.
Kasabay nito, pinapurihan ni Cruz ang mga awtoridad lalo’t walang naitalang mga insidente gaya ng petty crimes sa kasagsagan ng pista ng Quiapo.
Dakong alas-3:30 nang matapos ang traslacion o maipasok ang imahen ng Itim na Nazareno sa simbahan ng Quiapo matapos ang 22 oras.
Bahagi ng pahayag ni Archbishop Emeritus Oscar Cruz
Poverty incidence
Napapanahon na para tutukan ng gobyerno ang problema sa kahirapan.
Ito ang pananaw ni Archbishop Oscar Cruz matapos ang matiwasay na pagdaraos ng traslacion ng Itim na Nazareno.
Binigyang-diin sa DWIZ ni Cruz na dalawang kategorya lamang ng mga tao ang lumalahok sa traslacion.
Una, ang mga debotong nagpapasalamat at ikalawa, mayroong nagpupunta roon para humingi ng biyaya.
Idinagdag pa ni Cruz na mas maraming mahihirap ang nakikiisa sa traslacion kaysa sa mga mayayaman.
Bahagi ng pahayag ni Archbishop Emeritus Oscar Cruz
By Meann Tanbio | Balitang Todong Lakas