Naging maganda ang turnout ng implementasyon ng 30-pesos flag down rate sa mga taxi simula noong Sabado.
Sa kabila nito, sinabi sa DWIZ ni Land Transportation Franchising and Regulatory Board (LTFRB) Chairman Winston Ginez na may mangilan-ngilan pa rin na hindi sumusunod sa itinakdang flag down rate.
Ang reklamo aniya ay kanilang natanggap sa pamamagitan ng Twitter account ng LTFRB.
Ayon kay Ginez, maglalabas sila ng isang show cause order para paharapin ang driver at operator ng taxi.
“May directive na po kami sa aming legal division na padalhan po ito ng show cause ang operator at ang taxi driver, at i-ischedule as soon as possible ang pagdinig po dito.” Ani Ginez.
Hinikayat naman ng LTFRB ang mga pasahero na isumbong ang mga taxi driver na hindi tatalima sa P30 pesos flag down rate at P60 pesos para sa airport taxi.
Gayunman, iginiit ng LTFRB na ang rate para sa distansya at waiting time ay magiging epektibo lamang kung ipapa-calibrate at ipapa-reseal ang mga metro.
Ayon sa LTFRB, dapat tawagan ng mga pasahero ang kanilang 24-7 hotline number na 1342.
Maaari ring magpadala ng mga larawan at video ng mga tsuper na magmamatigas sa pamamagitan ng Viber sa 0917-550-1342 at 0998-550-1342.
Samantala, pagmumultahin ng P5,000 pesos ang mga taxi operator na mabibigong magpa-calibrate reseal ng metro.
By Meann Tanbio | Ratsada Balita | Drew Nacino