Nakahanda na ang PNP-Highway Patrol Group para umalalay sa mga motoristang bibiyahe ngayong Semana Santa.
Ayon kay PNP-HPG Spokesperson Ricky Caraval, nasa pitumpung (70) porsyento na ng kanilang tauhan ang kanilang naipakalat sa mga itinakdang lugar partikular na sa mga lugar na inaasahang dadagsain ng tao.
Kasabay nito, hinikayat ng PNP-HPG ang publiko na maging maingat sa kanilang biyahe lalo na kung ito ay patungo sa malalayong lugar.
Bus terminals
Nakatakda namang mag-ikot ang Quezon City Police District o QCPD sa mga bus terminal sa naturang lungsod.
Ito ay bilang bahagi ng paghahanda sa panahon ng Semana Santa kung saan inaasahan ang pagdagsa ng maraming bakasyunista.
Ayon kay QCPD Director Brigadier General Joselito Esquivel, kanilang isasagawa ang inspeksyon sa mga susunod na araw upang matiyak na ligtas at payapa ang mga terminal na dadagsain ng mga biyaherong tutungo sa kani-kanilang mga probinsiya.
Kabilang din aniya sa kanilang titiyakin ay mga driver ng bus upang masiguro ang kaligtasan ng mga biyahero.
—-
