Naniniwala si Senador Richard Gordon na posibleng may epekto sa mga otoridad ang pagiging malapit ni Pangulong Rodrigo Duterte sa China.
Ito’y kaugnay sa dapat sana’y aksyon aniya na ginagawa ng Anti Money Laundering Council (AMLC) hinggil sa pagpasok ng mahigit 400-milyong dolyar sa Pilipinas.
Ayon kay Gordon, pinayagan o tila may pangungunsinti sa panig ng otoridad dahil kahit pa aniya naisumbong na sa Customs ang pagkakapuslit sa bansa ng nasabing halaga ng pera, hindi pa rin gumagalaw ang AMLC.
Giit ni Gordon hindi ito mangyayari kung hindi masyadong malambot ang administrasyon sa China.
Sinasabing ang malaking halaga ng pera ay mula sa mga sindikato kung saan nasasangkot ang mga Chinese national at ang operasyon ng Philippine Offshore Gaming Operators (POGO).