Umiiral na sa buong bansa ang paggamit ng drop boxes kung saan maaaring isumbong sa mga awtoridad ang mga drug suspect.
Sa pamamagitan ng memorandum circular ng DILG o Department of Interior and Local Government na ipinalabas noong Agosto 29, itinatag ang community based program na Masa Masid o Mamamayang Ayaw sa Anomalya, Mamamayang Ayaw sa Iligal na Droga para labanan ang korupsyon, krimen, illegal drugs, extremist group at iba pang banta sa seguridad ng bansa.
Gagawin ito sa pamamagitan ng paglalagay ng drop box sa mga munisipyo, syudad at mga barangay kung saan ilalagay ng publiko ang kanilang sumbong.
Bukod sa drop boxes, maaari ring maiparating ang mahahalagang impormasyon sa pamamagitan ng itinalagang linya ng mga telepono, cellphone number at email address.
Pangungunahan ng mga barangay officials, chairperson ng barangay committee at kinatawan ng Civil Society Group ang pangongolekta ng mga impormasyon na idadaan naman sa beripikasyon.
Una nang ipinatupad ang paglalagay ng drop boxes sa mga barangay sa Quezon City na mariin namang tinutulan ng CHR o Commission on Human Rights.
CHR
Pinalagan ng CHR ang ipinatutupad na Masa Masid Program ng Department of Interior and Local Government na naglalayong isumbong ang mga drug personalities sa pamamagitan ng pagpapaabot ng mga reklamo sa drop boxes sa mga barangay.
Ayon sa CHR, kinikilala nila ang malaking maitutulong ng naturang community based programs at mga concerned citizens para labanan ang krimen at pagkalat ng iligal na droga.
Ngunit binigyang diin ng komisyon na posible itong maabuso lalo na ng mga taong may motibong manira lamang ng kapwa.
Sinabi ng CHR na dapat na sigurihin ng mga awtoridad na naturang program ay hindi lalabag sa karapatang pantao ng bawat indibiduwal na binibigyang proteksyon naman ng konstitusyon at iba pang international laws.
—-