Determinado ang Philippine Drug Enforcement Agency o PDEA na matupad ang utos ni Pangulong Rodrigo Duterte na malinis ang bansa mula sa iligal na droga pagdating ng taong 2022.
Sa pagpapasinaya ng Balay Silangan, isang localized reformation center sa Nueva Ecija kahapon, sinabi ni PDEA Director General Aaron Aquino na bagama’t mahirap na tuluyang malinis ang bansa sa illegal drugs ay mayroon naman silang nakalatag na plano para gawin ito.
Kasabay nito, hinikayat ni Aquino ang mga bagong halal na opisyal ng barangay na patuloy na makipagtulungan sa mga awtoridad para laban ang iligal na droga.
Sa ngayon ayon kay Aquino ay mga probinsya pa lamang ng Batanes, Southern Leyte, Biliran at Romblon ang idineklarang drug-cleared sa buong bansa.
—-