Inihayag ng transportation department ang pagpapasilip nito sa tunnel boring machines (TBM) na gagamitin sa pagpapagawa ng kauna-unahang subway sa bansa.
Ayon kay Transportation Assistant Secretary Goddess Hope Libiran, makikita ng publiko ang naturang tunnel boring machines sa opisyal na facebook page ng ahensya.
Dagdag pa ni Libiran, 6 na TBM mula Japan ang dadalhin sa Pilipinas para sa partial operability section ng subway project ng bansa.
Magugunitang sinimulan na ang konstruksyon ng higit P300 bilyong Metro Manila Subway na itinuturing na ‘project of the year.’
Kasunod nito, inaasahan ang partial operability nito sa mga susunod na taon at tinatayang sa 2025 na ito magiging full operational.
Ang naturang subway ay may habang 35-kilometro mula Quezon City hanggang NAIA sa Pasay City.
Oras na matapos ang naturang subway project, maseserbisyuhan nito ang higit 300,000 mananakay, at aabot na lamang sa 40-minuto ang travel time mula Quezon City hanggang Pasay City na kasalukuyang aabot ng dalawang oras.