Haharangin ng Department of Justice (DOJ) ang pagpapalaya ng korte ng Olongapo kay US Marine Lance Corporal Joseph Scott Pemberton sa kasong pagpatay sa isang transgender Pinay Jennifer Laude noong 2014.
Ayon kay Justice Secretary Menardo Guevarra, sila’y magsusumite ng ‘motion for reconsideration’ sa korte sa Olongapo City RTC branch 74 sa pamamahala ni Judge Roline Ginez-Jabalde.
Dagdag pa ni Guevarra, umaasa itong sasamahan ng Office of the Solicitor General ang DOJ para magsilbing abogado ng gobyerno kaugnay sa pag-apela nito sa desisyon ng RTC.
Bukod dito nauna nang nagsumite ng mosyon ang abogado ng pamilya Laude para harangin ang pagpapalaya sa suspect na si Pemberton.
Magugunitang naglabas ng desisyon ang korte na palayain si Pemberton, kahit hindi pa nito napagsisilbihan ang hatol ng korte na pagkakakulong sa kasong homicide.