Magtutulungan ang Department of Information and Communications Technology (DICT) at ang Philippine National Police (PNP) sa pagbuo ng ‘Task Force COVID Kontra Peke’ na tututok sa pagkalat ng mga ‘fake news’.
Sa pulong balitaan ng Laging Handa, noong ika-24 ng Marso, sinabi ni Deputy Chief Lt. Gen. Guillermo Eleazar na dapat masugpo ang pagkalat ng ‘fake news’ ukol sa COVID-19 pandemic.
Sinabi ni Eleazar na ang pagpapakalat ng pekeng balita ay maaaring makasama sa kalusugan ng iba dahil sa panic na maidudulot nito.
Kasunod nito, makikipagtulungan ang DICT cyber security bureau sa pag-aanalyze at information sharing sa mga ahensya ng gobyerno tulad ng PNP at National Bureau of Investigation (NBI) para masawata ang mga nagpapakalat nito.
Ayon sa mga awtoridad, sa mga magpapakalat ng ‘fake news’, maaari nilang kaharapin ang patung-patong na kaso tulad ng republic act 10175 o anti-cybercrime law at republic act 11469 o Bayanihan to Heal as One act.
Samantala, tiniyak ng ‘Task Force COVID Kontra Peke’ na tuloy ang kanilang kampanya kontra hoarding, overpricing, pagbebenta ng pekeng quarantine pass at iba pang maling gawain ngayong humaharap ang bansa sa krisis bunsod ng COVID-19.