Nadagdagan pa ng 46 ang bilang ng mga nagpositibo sa coronavirus disease 2019 (COVID-19) sa hanay ng Philippine National Police (PNP).
Batay sa pinakahuling tala ng PNP nitong Linggo, pumalo na sa 1,538 ang kabuuang bilang ng kaso ng virus sa kanilang hanay.
Sa kabila nito ay dumami naman ng 10 ang bilang ng mga naka-recover mula sa virus, dahilan para sumampa na sa 596 ang kabuuang bilang ng mga gumaling.
Nananatili naman sa siyam ang mga pumanaw dahil sa COVID-19.
Nasa 1,600 naman ang mga ikinokonsiderang suspected COVID-19 cases sa PNP at 732 naman ang mga probable cases.
Samantala, patuloy naman ang paalala ng PNP sa kanilang mga tauhan na agad na makipag-ugnayan sa kanilang health service kung makaramdam ng anumang sintomas na COVID-19.