Hinarang ng Court of Appeals ang nakatakdang deposition o pagkuha ng out-of-court testimony kay Mary Jane Veloso, ang Pilipinang nasa death row sa Indonesia dahil sa kasong drug trafficking.
Ito’y makaraang magpalabas ang C.A. 11th division ng temporary restraining order na pumipigil sa nakatakdang deposition kay Veloso sa April 27.
Sa tatlong pahirang resolusyon na isinulat ni Associate Justice Ramon Bato, nagpalabas ito ng 60 araw na TRO.
Kasunod na rin ito ng pagdulog ng kampo ng mga akusado na sina Maria Cristina Sergio at Julius Lacanilao sa Appellate Court dahil sa oras na matuloy umano ang deposition, malalabag ang kanilang karapatan na makaharap ang nag-aakusa laban sa kanila na gina-garantiyahan ng 1987 constitution.
Binigyang diin pa ng mga akusado ang itinatadhana ng rules of court na pinapayagan lamang ang deposition sa pamamagitan ng “written interrogatories” sa mga kasong sibil at hindi sa mga kasong kriminal.
Kasabay nito, pinagbigyan naman ng C.A. ang hirit ng Office of the Solicitor-General na kumakatawan sa Nueve Ecija Court na bigyan sila ng dagdag na panahon para makapag-sumite ng komento kung bakit hindi na dapat palawigin ang pagpigil sa nakatakdang deposition kay Veloso sa pamamagitan ng writ of preliminary injunction.
By: Drew Nacino / Bert Mozo
