Itinalaga ni Pangulong Rodrigo Duterte bilang bagong Associate Justice ng Korte Suprema si Court of Appeals Justice Priscilla Baltazar-Padilla.
Ito ang inianunsyo ni Presidential spokesman Harry Roque nitong Lunes, kung saan ookupahan nito ang nabakanteng posisyon ni dating Associate Justice Andres Reyes na nagretiro noong ika-11 ng Mayo.
Magugunitang sa unang online public panel interview ng Judicial and Bar Council (JBC), sinabi nito na hindi mapipilit ang Kongreso na pagkalooban ng prangkisa ang isang organisasyon dahil ang prangkisa ay isa aniyang pribilehiyo at hindi maaaring hingin bilang isang karapatan.
Dagdag pa nito, hindi rin aniya angkop na remedyo ang isang joint resolution ng Kongreso sa isyu ng franchise renewal ng ABS-CBN network dahil batas, at hindi aniya resolusyon lamang, ang kailangan.
Samantala, sa ilalim ng binagong rules ng JBC para sa mga aplikante para sa SC associate o chief justice, kinakailangang mayroon itong 2.5 na nalalabing taon sa serbisyo kung dati itong naninilbihan bilang isang associate justice o namumuno ng isang appellate court, court administrator, chairperson ng isang constitutional commission, solicitor general o di kaya ay department secretary.