Nagluluksa ang buong hanay ng Armed Forces of the Philippines (AFP) sa pagkamatay ng 11 sundalo matapos maka-engkuwentro ang Abu Sayyaf Group sa Patikul Sulu kahapon.
Ayon kay AFP Spokesman Marine Brig. General Edgard Arevalo, ipinagutos na ni AFP Chief of Staff General Filemon Santos Jr. ang paglalagay sa half-mast ng watawat ng Pilipinas sa lahat ng kampo militar at detachments sa buong bansa.
Sinabi ni Arevalo, sa kabila ng pagiging abala ng pamahalaan sa giyera kontra coronavirus disease 2019 (COVID-19), patuloy pa ring titiyakin ng militar na hindi magwawagi ang terorismo.
Sinabi naman ni Philippine Army Spokesperson Col. Ramon Zagala na kanilang dinadakila ang mga tauhan ng 21st infantry battalion na sumagupa sa may 40 mga bandido.
Aniya, hindi matatawaran ang kabayanihan ng mga sundalong nag-alay ng kanilang sariling buhay para matiyak ang seguridad at katatagan ng bansa sa kabila ng kinahaharap na krisis sa COVID-19.
Samantala, tiniyak naman ng AFP na mabibigyan ng ayuda ang pamilya ng 11 nasawing sundalo at 14 na iba pang nasugatan sa engkuwentro. — ulat mula kay Jaymark Dagala (Patrol 9)