Tinanggap na ni Atty. Vitaliano Aguirre ang alok ni presumptive president Rodrigo Duterte na maging Justice Secretary.
Si Aguirre na naging kaklase ni Duterte sa law school sa San Beda College ay kabilang sa mga abogadong nagtanggol sa alkalde sa mga isyung ibinabato rito sa kasagsagan ng kampanya.
Ang nasabing abogado ay kabilang sa legal team ni Hubert Webb sa Vizconde massacre case.
Samantala, tinanggap na rin ni dating Securities and Exchange Commission Perfecto Yasay ang alok ni Rodrigo Duterte na maging acting Foreign Affairs Secretary.
Ayon kay Yasay, isa itong oportunidad at hamon para sa kanya upang paglingkuran ang bayan at ikinatutuwa rin niya ang pagtitiwala ni Duterte sa kanya.
Anya, pinagpapahinga siya ng alkalde sa pagtuturo sa isang unibersidad sa Hawaii, sa Amerika upang tutukan ang trabaho bilang acting Secretary ng Department of Foreign Affairs.
Isang taong magsisilbi bilang kalihim si Yasay na gaya ni Duterte ay tubong Mindanao hanggang i-turnover ang posisyon kay Senador Alan Peter Cayetano na naging running mate ng alkalde ng Davao.
By Drew Nacino