Hindi pa ligtas sa kasong kriminal ang dalawang police generals na kasama sa narco list ng Pangulong Rodrigo Duterte.
Sinibak na sa serbisyo sina Generals Joel Pagdilao at Edgardo Tinio dahil sa kasong administratibo tulad ng Serious Neglect of Duty.
Ayon kay Chief Superintendent Dionardo Carlos, spokesman ng Philippine National Police o PNP, sinibak sa serbisyo sina Tinio at Pagdilao dahil nag-resulta sa pagkalat ng illegal drugs ang kanilang pagpapabaya sa tungkulin.
Sinabi ni Carlos na maaari pang maharap sa kasong kriminal sina Tinio at Pagdilao sa sandaling may makitang matibay na ebidensya na mayroon silang direktang partisipasyon sa pagkalat ng illegal drugs.
Sa ngayon aniya ay maaari pang i-apela nila Tinio at Pagdilao ang pagsibak sa kanila sa tanggapan ng Pangulong Rodrigo Duterte.
Samantala, patuloy naman ang imbestigasyon ng National Police Commission o NAPOLCOM sa tatlo pang police generals na kasama sa narco lists na sina Chief Superintendent Bernardo Diaz at retired Generals Vicente Loot at Marcelo Garbo.