Isinailalim na sa code white alert ang lahat ng 16 na ospital ng Department of Health (DOH) sa Metro Manila para sa Traslacion 2020.
Sa ilalim ng code white alert, dapat ay available at nakahanda na ang emergency medicines at supplies lalo na ang mga para sa trauma needs.
Kailangan ding naka-standby ang mga medical specialist para kaagad magamot ang mga pasyente, samantalang on-call status din ang emergency service personnel, nursing at administrative personnel.
Ipinabatid pa ng DOH na magpapakalat din ng 14 na health emergency response teams sa strategic areas sa ruta ng Traslacion para magbigay ng emergency medical services sa libu-libong mga deboto.
Pinaalalahanan ng DOH ang mga deboto na iwasan nang magsama ng bata at hindi na rin dapat sumama sa prusisyon kung buntis.