Ipinag-utos naman ng lokal na pamahalaan ng Marikina sa kanilang lokal na pulisya na palayain ang may 10 volunteer workers ng isang grupo.
Ito’y makaraang mapagkamalang rallyista ang nasabing grupo na nagsasagawa lang ng feeding program sa lungsod kasabay ng Labor Day o Araw ng Paggawa kahapon.
Ayon kay Marikina City Mayor Marcelino “Marcy” Teodoro, tila nagkamali ng interpretasyon ang mga pulis nang ilatag ng grupo ang kanilang placard na may nakasulat na katagang “mass testing”.
Giit ng Alkalde, nagpaalam sa kaniya ang grupo na tinawag na Bayanihang Marikeña at Marikeño kaya’t wala siyang nakikitang mali sa ginawa ng mga ito para arestuhin.
Kaya naman mahigpit na binilinan ni Mayor Teodoro ang Marikina City Police na huwag kasuhan ang 10 mga naaresto dahil wala namang ginagawang paglabag ang mga ito.
Magugunita na ang mass testing ay kabilang sa mga adbokasiya ni Mayor Teodoro upang mabigyang ayuda ang lahat ng Pilipino na mailayo sa panganib na dulot ng 2019 coronavirus disease (COVID-19).